“რეალს” ბეილის ტრანსფერში გვარდიოლა შეეცილება

მოგეხსენებათ, მადრიდის "რეალი” "ტოტენჰემ ჰოთსპურის” უელსელი მარცხენაფლანგელის, გარეტ ბეილის გადაბირებაზე მუშაობს. "სამეფო კლუბს” სერიოზული კონკურენტი გამოუჩნდა. აღნიშნული ტრანსფერის განხორციელებას მიუნხენის "ბაიერნიც” შეეცდება.

ბრიტანული "დეილი მეილის” ინფორმაციით, ბავარიელები ფეხბურთელის სანაცვლოდ "დეზებს” 60 მილიონ ევროს შესთავაზებენ.

ხოსეპ გვარდიოლა "ბაიერნის” გაძლიერებას მსოფლიო დონის ფეხბურთელების დამატებით აპირებს. გერმანულ გრანდში "ბარსელონას” მოთამაშეების გადასვლა ნაკლებად სავარაუდოა, ამიტომ ბავარიელებს სატრანსფერო მოლაპარაკებების წამოწყება სხვა გუნდებთან მოუწევთ. რა თქმა უნდა, მათ შორის "ტოტენჰემი” და ბეილიც იგულისხმება.

"რეალის” ხელმძღვანელობას კარგად ესმის, თუ რაოდენ რთული იქნება ბეილის ტრანსფერის განხორციელება, თუმცა კლუბის პრეზიდენტ ფლორენტინო პერესს სჯერა, რომ უელსელი ფეხბურთელი სწორედ მადრიდულ კლუბს აირჩევს.