ლამპარდი საბავშვო წიგნებს დაწერს

ლონდონის "ჩელსის” ვეტერანი ნახევარმცველი ფრენკ ლამპარდი საბავშვო წიგნების დაწერას აპირებს. BBC-ის ცნობით, 34 წლის ინგლისელმა კონტრაქტი გამომცემლობა Little Brown Book Group-თან გააფორმა. ამგვარად, ლამპარდი 5 საბავშვო წიგნს გამოუშვებს. 

ლამპარდი მკითხველს თავის თავზე, მეგობრებზე, თანაკლასელებზე და საყვარელ ძაღლ "მაქსიზე” ისტორიებს მოუყვება. წიგნები 5 წლის ზევით მყოფ ბავშვებზე იქნება გათვლილი. 

პირველი ტომი – "ფრენკი მეკობრეების წინააღმდეგ”, ივნისში გამოვა. 2013 წელს კიდევ 2 წიგნის პრეზენტაცია შედგება, უკანასკნელ 2 ტომს კი, 2014 წელს ელიან. 

"იდეა ფრენკზე და გიგანტურ ბურთზე თავში მაშინ მომივიდა, როცა ჩემს შვილებს ზღაპრებს ვუკითხავდი. ჩვენს ოჯახში სპორტი და წიგნები მნიშვნელოვანია. აქედან გამომდინარე, წიგნების დაწერა თავად გადავწყვიტე”, - განაცხადა ლამპარდმა.